Fundur með atvinnuveganefnd og umsögn um fiskveiðistjórnunarfrumvarp

SFÚ var boðið að koma á fund atvinnuveganefndar Alþingis þriðjudaginn 26. febrúar 2013 til að kynna viðhorf samtakanna til frumvarps til laga um stjórn fiskveiða, 570. mál á yfirstandandi þingi. Formaðurinn var erlendis en af hálfu SFÚ mættu Aðalsteinn Finsen, Albert Svavarsson og Ólafur Arnarson. Einnig voru mættir fulltrúar frá Félagi atvinnurekenda, SÍF og smábátasjómönnum.

Upphaflega hafði SFÚ sent sameiginlegt álit með FA og hinum samtökunum en að þessu sinni sendum við okkar eigið álit sem sneri eingöngu að okkar beinu hagsmunum með áherslu á samkeppnismálin og fiskmarkaðina.

Í frumvarpinu er ekki komið inn á fiskmarkaði og ekkert tillit er tekið til álits og tilmæla Samkeppniseftirlitsins frá 19. nóvember sl. um að ráðherra geri gangskör í því að bæta úr samkeppnismismunun, sem leiðir af núgildandi lögum um stjórn fiskveiða.

Fulltrúar SFÚ á fundinum lýstu óánægju, vonbrigðum og áhyggjum af því að ekki skuli í neinu hafa verið gerð tilraun til að bæta úr samkeppnismismunun þrátt fyrir bein tilmæli frá SKE. Umræður spunnust m.a. um tvöfalda verðmyndun í sjávarútvegi og mikilvægi þess að tryggt verði að stærra hlutfall af fiski komi á fiskmarkaði en nú er.

Umsögn SFÚ um frumvarpið má lesa hér.